ຂ່າວສານ ແລະ ກິດຈະກຳ

 

ລາຍລະອຽດ

ເຊັນສັນຍາຊື້ຂາຍຮຸ້ນໂຮງສີເຂົ້າ 13 Mar 2024

ກຸ່ມບໍລິສັດໂຊກໄຊ ບຸກທຸລະກິດກະສິກໍາ . -------------------------------------------- ໃນວັນທີ 13 ມີນາ 2024 ໄດ້ມີພິທີເຊັນສັນຍາຊື້-ຂາຍກິດຈະການໂຮງສີເຂົ້າຄົບວົງຈອນ ລະຫວ່າງ ກຸ່ມບໍລິສັດໂຊກໄຊ ຈໍາກັດຜູ້ດຽວ ແລະ ບໍລິສັດ ຍອດອ້ອຍ ໂຮງສີເຂົ້າທັນສະໄໝ ຈໍາກັດຜູ້ດຽວ ໂດຍການລົງນາມຂອງທ່ານ ພັນປະກິດ ອ່ອນພັນດາລາ ຮອງປະທານກຸ່ມບໍລິສັດ ໂຊກໄຊ ຜູ້ຊີ້ນໍາຂົງເຂດທຸລະກິດການຄ້າ ແລະ ການລົງທຶນໃໝ່ ແລະ ທ່ານ ນາງ ເພັດອຸໄທ ບູນຍະແສງ ຜູ້ອໍານວຍການ ບໍລິສັດຍອດອ້ອຍ ໂຮງສີເຂົ້າທັນສະໄໝ. ພາຍຫຼັງສະພາບການແຜ່ລະບາດ ໂຄວິດ 19, ກຸ່ມບໍລິສັດ ໂຊກໄຊໄດ້ຫັນມາສົນໃຈຄົ້ນຄວ້າ-ລົງທຶນໃສ່ທຸລະກິດກະສິກຳໂດຍສະເພາະພຶດເສດຖະກິດ ເປັນຕົ້ນ ເຂົ້າ, ກາເຟ ແລະ ຊາ, ຊຶ່ງໄດ້ເລີ່ມສຳຫຼວດສຶກສາການລົງທຶນທຸລະກິດດ້ານກະສິກໍານັບແຕ່ປີ 2022 ເປັນຕົ້ນມາ. ໃນປີ 2024 ກຸ່ມບໍລິສັດ ໂຊກໄຊ ຍັງມີແຜນສຶບຕໍ່ຂະຫຍາຍທຸລະກິດໃນຫຼາຍຂະແໜງການເສດຖະກິດ ໂດຍສຸມໃສ່ຂະແໜງກະສິກຳ ເພື່ອປະກອບສ່ວນໃນການຄໍ້າປະກັນສະບຽງອາຫານພາຍໃນປະເທດ, ໂດຍສະເພາະການສົ່ງເສີມຊາວກະສິກອນທີ່ປູກເຂົ້າ ເພື່ອບໍລິໂພກພາຍໃນ ແລະ ສົ່ງອອກຕ່າງປະເທດ.  ສະນັ້ນ, ຈຶ່ງໄດ້ລົງທຶນໃນກິດຈະການໂຮງສີເຂົ້າທັນສະໄໝ ຢູ່ເມືອງສອງຄອນ, ແຂວງສະຫວັນນນະເຂດ. ແຜນທຸລະກິດໃນເບື້ອງຕົ້ນ ບໍລິສັດ ພວກເຮົາຈະເລັ່ງເກັບຊື້ເຂົ້າ ເປືອກ ແລະ ຜະລິດເຂົ້າສານ ໃຫ້ໄດ້ 2 ພັນໂຕນ/ເດືອນ, ລວມ ປະມານ 20 ພັນໂຕນ ໃນປີ 2024 ແລະ ໃນປີ 2025 ຄາດຄະເນຈະເພີ່ມກຳລັງການຜະລິດເປັນ 3 ພັນໂຕນ/ເດືອນຫຼື ຫຼາຍກວ່າ 36 ພັນໂຕນ/ປີ ແລະ ຈະສືບຕໍ່ເພີ່ມກຳລັງການຜະລິດໄປເລື້ອຍໆ ເພື່ອຕອບສະໜອງຕະຫຼາດພາຍໃນ ແລະ ສົ່ງອອກຕ່າງປະເທດໂດຍສະເພາະ ສສ.ຫວຽດນາມ ແລະ ສປ.ຈີນ.